Komo mayornan di un mucha muhe speshal, nos mester a hasi uso di dokter Faries su servisionan den diferente okashon. Tabata tin dos oportunidat ku nos yu mester a wòrdu ingresá den Unidat di Pediatria di St. Elizabeth Hospital (SEHOS), ku tabata memorabel pa nos.
Den tur dos oportunidat, e tim di dokternan i zusnan di pediatria di SEHOS, huntu ku dokter Faries partikularmente, a soru pa saka nos yu for di e estado kritiko ku e tabata den dje. Nos por bisa ku nos yu, Oriana Limongi, kende lamentabelmente no ta mas serka nos, por a biba basta aña mas, danki na hende manera dje.
Nos no ta kansa di gradisi Sonja Faries pa skucha nos komo mayornan, konsiderando ku ta nos tabata konose nos yu miho ku kalke otro hende. Nos lo rekonosé semper pa su sinseridat, su profeshonalismo, su palabranan direkt i pa tur e bishitanan ku e tabata hasi na su pashentnan sin wak mes ku ta djadumingu of dia di fiesta.
Ora bo ta mayor di un mucha speshal, bo ta sera konosi ku yen klinika, laboratorionan, speshalistanan i naturalmente, hopi pediatra. Den un bon parti di nos bida, nos a yega di haña yudansa serka hopi profeshonalnan ku ta hasi nan trabou korektamente, pero tambe tabata tin algun ku no ta asina. Dokter Faries ta forma parti di un di tres grupo, esta unu ku ta bai hopi mas aleu ku e dosnan prome. E ta un tipo di profeshonal ku ta envolve su mes. Ku ta konose bon su pashentnan i ku ta asumi kada kaso komo si fuera ta di su mes.
Semper nos a mira Sonja Faries komo e miho pediatra ku tin na Kòrsou, pa nos mes eksperensia. Un kos hopi grandi mester pasa pa nos kambia di opinion, i e motibunan pa lokual ela wordu suspende, no ta sufisiente pa kambia e imahen ku nos tin di dje.
Verónica Cruz i Alfredo Limongi
Comentarios
Publicar un comentario