Un komentario interesante tokante inmigrantenan

Na hopi okashon nos a skucha den medionan lokal over di e problemanan di imigrantenan. Ta parse ku tin un impreshon ku e yegada di e imigrantenan aki ta trese solamente problema nan ku n’e. Pues mas hende pa kome di e mesun bolo. Sinembargo, ta poko bes bo ta skucha ku ta wòrdu bisa kon e imigrantenan aki ta yuda e sosiedat engrandese e bolo.

[Este artículo también está disponible en Español]

Den un programa di radio, fecha djárason 22 mei, na e emisora Z86 di Kòrsou, e periodista Orlando Cuales a trese un reflekshon hopi importante dilanti, over di imigrantenan i kon nan ta aportá na e komunidat. E periodista aki ta menshoná ku na nivel global, 3% di e poblashon na mundu ta imigrante. Sinembargo, e aportenan kombiná di GDP (Gross Domestic Product) na e paisnan kaminda e imigrantenan ta, ta di 9%.

E splikashon ta simpel. Normalmente e imigrantenan aki ta hasi tur loke ta posibel pa produsi i duna nan famia e stabilidat ku nan a perde. Esaki ta pone ku e hendenan aki ta hende realmente enfoká, trahadó i ku hopi deseo pa progresá. Pa e motibu aki nan produktividat ta tres biaha mas tantu ku esun na nivel global.

Esaki ta bon òf malu pa e paisnan den kual nan ta drenta?

Pa paisnan manera Merka i Canada, entrada di e imigrantenan no a resultá nan niun tiki malu. Nan ta potensianan ku debidamente ta aportá na e pais. Venezuela, den su mihó tempunan, tambe tabata gradesido na yegada di kantidat nan grandi di imigrantenan for di Oropa. Den mayoria kaso, nan tabata hendenan no muchu kalifiká. Poko aña despues, e kantidat di trabou den e pais a amplia komo resultado di e kuponan di trabou nobo ku a keda generá dor di e esfuerso di imigrantenan.

Kòrsou tambe ta un pais di imigrantenan. E gran mayoria de esnan nase riba e isla, tin un ekstranhero komo famia den su antepasadonan mas serkano. E realidat aki lo mester hasi nos por lo ménos bira mas sensibel na fabor di e imigrantenan ku ta yega nos isla pa buska un mihó bida. Kisas nos lo mester mira den algun di esnan ku ta yega komo hendenan ku ta famia di nos propio antepasadonan. Personanan ku kisas ta pasando den e momentunan di mas difísil di nan bida, pero ku sigur ta dispuesto na hasi nan máksimo esfuerso pa bai dilanti den bida.

Mare nos dirigentenan por enfoká nan mes mas riba un maneho di integrashon i no solamente di protekshon. Kisas aki un tempu nos lo keda sorprendi dor di ripara kon e imigrantenan, leu di ta un di kousanan di e krisis ku nos ta pasando den dje, por bira un solushon pa e problema di nos ekonomia.